الفول بيقول.....

موضوع: الفول بيقول..... الخميس مارس 20, 2008 12:36 am

بمناسبة الغلاء والناس ماشية بتكلم نفسها فى الشارع
وانا اقرأ مجلة وجدت قصيدة جميلة عن هذا الموضوع
قلت اهو حاجة ننسى نفسنا بيها
القصيدة بعنوان الفول بيقول ..

الفول بيقول
أنا لك على طول
بس أنت تقول انا عايز فول
تلاقيه فى العز
وفى الازمات
من غير طوابير
ومن غير خناقات
من غير دنانير
من غير دولارات
وعيالك وانت وكله يبات
متهنى وراضى بنين وبنات
بس انت تقول انا عايز فول
والفول بيقول:
الفول ده صديق
والفول ده جرئ
وبيفتح جوة المعدة طريق
ويهد قلوع جوه المفجوع
ويسد الجوع يمكن اسبوع
ويعدى ولو فى 200 مشروع
بس انت تفكر فى الموضوع
وبسرعة تقول انا عاوز فول
والفول بيقول:
من غير يا صاحبى هتعمل ايه؟
هتقول لى انا هافطر شاى وباتيه!
واتغدى كباب واتعشى فليه!
طب بكرة يا صاحبى هتعمل ايه؟
طب بعده ازاى تتصرف فيه؟
ده الفول يستاهل حمد عليه
إدعليه يا شيخ ربى يخليه

من مجلة كلمات
العدد الرابع
اتمنى يعجبكم